top of page
Search
  • Writer's pictureDee DeVille

Hla Copyright, Tu Ta Nge?

Updated: Dec 13, 2021

Kan band-in hla kan phuah a, kan record a, tu ta nge ni ta? Awlsam taka chhan theih a ni miah lo mai. A hla thu phuahnaah mi engzat nge inhnamhnawih? Recording tihnaah midang an inhnamhnawih em? Producer kan ruai em? Band agreement kan nei em? Recording ti turin engtin chiah nge midang kan chhawr? A chhanna azirin hla neitu kan hre thei chauh ang.
Hla neitu tih hian, mi pakhat chauh kan sawi lo tlangpui a, a chhan chu, hla reng reng hian copyright chi hrang pahnih - Musical Work Copyright (a thu leh a thluk) leh Sound Recording Copyright-te a nei a, hla phuahtu leh record-tu (producer) te ta a ni. Indian Copyright Act pawhin hla hi thil pakhat angin a en lo a, thil hrang hrang hlawm khawm leh chu thil hrang hrang chu a neitu pawh a hrang vekin a en a ni. He dan hian hla pakhata a neitu hrang hrang a thliar dan chu hetiang hian a ni:
1. Lyricist (Hla thu phuahtu) - Copyright Act Section 2(d)(i) - Hei hi Musical Work Copyright kan tihah khian a bung khatna a ni mai e. Hla thu phuahtu hi "author" a ni a, a kutchhuak hi thuziak (ti mai ila, literary work) hnuaiah a lut a, author anih avangin, a copyright hi venhimna a dil thei. A phalna lo chuan hei hi engti kawng maha lo hman phal a ni lo a ni.
2. Composer (Hla thluk phuahtu) - Copyright Act Section 2(d)(ii) - Hei hi Musical Work Copyright bung hnihna a ni leh thung a, hla thluk phuahtu ta a ni a, a thluk bik atan "author" a ni, a thluk atan hian copyright venhimna a dil thei thung. A chung ami ang bawk hian, he hla thluk hi hla thu dangah emaw, engti kawng maha hman sak phal a ni lo. Mi pakhatin hla a phuah a, a thluk a siam bawk anih chuan, Lyricist leh Composer a ni kawp tihna a ni.
3. Singer/Performer - Copyright Act Section 2(qq) - Artist-in hla phuahtu phalna neia hla a sak hian a zai (perform) a ni. Hei hi Performer's Right an ti a, a zai hi "sound recording" a siam thei a, a thehdarhtu leh hralhtu a ni nghal thei bawk, midangin an lo thehdarh/hralh sak thiang lo. Mahse!! He right hian Musical Work Copyright khi a va nek thiang lo reng reng a, a hnuaia kan sawi leh tur Producer-te right pawh hi a nek thiang chuang lo. Hla phuahtu (emaw phuahtute) phalna tel lo chuan, an hla hi lo perform tur a ni lo tihna a ni.
4. Producer - Copyright Act Section 2(d)(v) tarlan dan chuan Sound Recording titu hi hla (sound recording) atan "author" a ni. A neitu a ni. Producer tih hian, hlawh neia inchhawr, (work for hire) a awm thei a, chutiang a awm anih chuan, a senso tumtu chu Producer a ni. Section 2(uu) tarlan dan chuan, Producer tih chu "sound recording" atana senso tumtu leh mawhphurhna latu a ni. Entirna'n mi pakhatin man chawiin studio a hawh a, musician te, Sound Engineer-te a ruai a, Producer chu a a mi rawihte ni loin, amah a ni. He "sound recording" hi copyright (Master Right) nei a ni a, a neitu (author) chu Producer hi a ni, hei pawh hi copyright venhimna lak theih vek a ni.
Copyright reng reng hi tawp hun nei vek a ni a, India dan chuan heng copyright-te hi a neitu (author) dam hun chhung leh, an thih atanga kum 60 chhung a dam a, Singer/Performer tan chuan an dam hun chhung leh kum 50 dang a ni thung a ni.
Lyricist leh Composer te hian ziakin (inremna) an dah anih lem loh chuan, an thuneihna hi zat leh zatin an insem tihna a ni a (mi pahnih an nih chuan 50% ve ve, 3 an nih chuan 33.3% theuh), mi pakhatin tlar khat lek lo phuah ve pawh ni se, thunei tam bik an awm thei lo a ni. Hetiang hi anih avangin, mi pakhat aia tam nih chuan, ziaka dah a finthlak hle. Chutiang bawkin, Producer hian hla phuahtu leh artist leh ama inkarah inremna mumal tak a neihpui hnuah, ziaka dah vek a tha hle bawk.
Master Right hi a pawimawh hle, a studio neitu ang zawng pawhin hmasawn kan ngaihna a ni. Master Right hi hla publish theihna ber chu a ni a, thehdarh, hralh, upload, release etc.. dawn chuan he Right hi neih ngei ngei tur a ni a, neih loh pawhin a neitu nen inremna a awm tur a ni.
St Ange Lab hmangtu reng rengin, an hla publish apiangah rights felfai takin an nei sa tura ngaih a ni. Chhiar belh duh tan link-ah hian a awm e.
Disclaimer: We are not lawyers. This article provides a survey introduction to the laws in India relevant to the music industry, is not intended as and shall in no way be construed as legal advice or a legal opinion on any specific set of facts or circumstances, and shall not be construed as creating an attorney-client relationship.
96 views0 comments

Recent Posts

See All

Comments


Post: Blog2_Post
bottom of page