top of page
Search
  • Writer's pictureDee DeVille

Mechanical Royalty leh Recording Royalty kalkawng

Updated: Dec 13, 2021



Composition Rights leh Master Rights han tih te hian hming hrang hrang a lo ngah khawp a, a awlsam zawng chuan hla pakhata Copyright awm thei pahnih kan sawi te kha an ni mai a, han sawi nawn leh reng reng ila, Composition Rights neitu chu Composition Copyright neitu kan tih kha a ni mai a, hla phuahtu emaw, thu leh a thluk Copyright neitu kha a ni. Master Rights neitu ve thung chu, Artist emaw Record Label (an agreement neih dan azirin, hei te pawh hi kan la sawi zau zel dawn nia) an ni ve thung a, phalna neia kha hla lo record tawhte kha kan sawina a ni.


Tunlaia lar tak, Spotify, Apple Music, YouTube Content ID leh a dangte hian, hla pakhat zelah royalty chi hnih an pe chhuak thin a, chungte chu Recording Royalty leh Mechanical Royalty a ni.


Recording Royalty chu Recording Rights neitu, Artist/Label chanpual a ni a, hei hi distributor (DSC) kaltlangin sem a ni a, Mechanical Royalty ve thung chu Publishing Rights neitu; Lyricist leh Composer chanpual a ni ve thung a, hei hi an Publisher kaltlangin pek a ni thung thin.


Hei tun hnaiah, St Ange chuan distribution platform (hla release-na portal), Digital Supply Chain, St Ange Lab kan han siam a, hla ngaihthlak (stream/play/sell) theihna platform lian zawng zawngte nen inremna nghet tak (Direct Distbution Deal) kan nei a, Label leh artist te'n anmahni kutkawih ngeia hla an release theih turin software leh website kan siam bawk a, hla release bakah hian royalty dawng thei turin heng DSP hrang hrangte nen hian inremna kan nei a, Recording Royalty hi artist/label hnena a kal theihna tur kawng kan sial tihna a ni.


Mechanical Royalty hi claim tur chuan, Publisher emaw Publishing Admin neih ngei ngei a ngai a, a kaihhnawih Perfomance Royalty te pawh a la awm zel a, hei hi claim tur chuan Performing Rights Organization (PRO) eng emaw berah inziahluh a ngai a ni, mimala umzui tur chuan a hautakin a buaithlak em em thin a, hei vang hian Publishing Company/Admin te leh PRO te hi an thawkdun fo a ni. India-ah chuan IPRS kan nei a, khawvel pum huap chuan ASCAP, BMI leh SESAC te hi PRO lar ber an ni awm e, kan mamawh dan uluk taka zir chian phawt a tha khawp mai, hla phuahtu leh a hla ngaithlatu tam deuhna ram azirin mamawh dan a danglam viau thei ang.


Hla phuahtute royalty lo khawn sak tur hian St Ange Pub din chhoh leh kan tum mek a, Publisher hrang hrang kan dawr mek a ni. Hriat lawk atan, Publisher reng reng hian royalty atangin lo lak chin an nei zel a, Publishing License vawng nung turin kum tin chawi ngai a awm ve thin bawk a ni.

55 views0 comments

Recent Posts

See All

Comments


Post: Blog2_Post
bottom of page