top of page
Search
  • Writer's pictureDee DeVille

Music Royalty - I la thei em?

Updated: Dec 13, 2021

Copyright I nei em, Royalty lak tur I lo nei reng mai thei asin. Royalty la tur chuan Music Copyright neitu I nih ngei ngei a ngai a, Copyright hrang hrangte leh a neitute chungchang kan sawi lan tawh kha (chhiar duh tan hei hi link) a aia chipchiarin sawi zau teh ang.

Music Copyright tih hian thil pahnih kal kawp tlat a awm kan tih tawh kha. Pakhatna chu Composition (Publishing Rights) a ni a, hla thu leh a thluk sawina a ni. A pakhat leh chu Master Recording (Master Rights) a ni a, Recording a nih ang hian, hla ngaihthlak theiha awm tawh sawina a ni. Composition Copyright (Publishing Right) hi hla phuahtu leh a thluk siamtu ta a ni a, inphuah ṭawm a nih chuan, mi pakhat aia tamin copyright neitu nihna an nei thei tihna anih chu, Publisher hnuaia awm an nih chuan, an copyright hi Publisher in an enkawl sak mai thin. Helai bikah hian thil dang tam tak a la awm belh thei a, chung zinga langsar deuh chu hla hralh a ni. Miin a hla a hralh chuan, a leitu zawkin copyright hi a nei tawh zawk a ni. Hnampui zingah phei chuan hla hralh hi an tam hle a, rap music-ah phei chuan an tam lehzual hle a, an hming a lan ngai loh avangin "Ghost Writer" tiin an sawi thin. Hla hralh ni lem loa an hla sak phal vanga lawmman inpek ve hrim hrim te pawh a awm a, heng hi chu hla hralh/lei anga chhiar theih a ni lo a, copyright neitu pawh a danglam lo ang.

Master Recording lam hrut ve leh ila, hei hian a ken tel chu Master Rights a ni a, hla satu artist-in a zai a record hunah, he copyright hi a lo piang a, an inremna (contract) neih dan azirin artist emaw, producer emaw te ta a ni a, Label an neih chuan, an Label hian a enkawl sak mai thin. Zawhna kan dawn fo thin pakhat chu, Copyright registration chungchang hi a ni a, thil awlai a ni miah lo a, tih tur tul tam tak a awm a, mahse neih tluk a awm lo. Hla i phuah chuan Copyright chu i ta a ni, Studio hire-in i record a, Master Rights pawh i ta tho a ni. Registration i tih chuan, I rights te hi I venghim tihna ania, a tul hunah, copyright neitu I ni tih I finfiah theihna a ni bawk. Blog post hmasaah khan heng Copyright chi hnih leh a neitu ni thei hrang hrang kan tarlang tawh a, khilaia sawi ang khian, Royalty la tur chuan eng copyright emaw ber hi I neih a ngai a ni. Kalphung felfai lo deuh taka kan lo kal rei tawh avangin, Mizoram Music Industry ah chuan neuh neuh a la tam viau rih ang. Hla phuahtuin a phalna thlapa a sak tir hnuah, Artist emaw Label-in mipui ngaithlak theih tura dah a khap leh hnuhnawh thei ngawt bik lo a, a chhan chu Publishing Right nei mahse, Master Right kha Artist/Label ta a ni a, a tih theih chu royalty claim siam a ni mai. Publishing Royalty hi a vaiin a claim thei a, Master Royalty (Mechanical Royalty) erawh hi chu a claim ngawt thei lo a, contract/agreement an neih dan azirin hei hi chu Artist/Label hian a pe ve thei chauh zawk a ni. Hla kha an lo in lei tir a nih phei chuan, a phuahtu ka ni pawh a ti thei tawh lo hial zawk ang chu. Hetiang hi kalphung a nih avangin, contract/agreement hi a pawimawh em em a, kan uar pawh a ngai tawh hle. Hnampui zingah hian contract neih mumal loh vangin emaw, an contract-in a phuar tlat avangin, Artist thenkhat chuan an zai ngeiah pawh royalty pawh an chang miah lo hial fo a, an inremnaah a tel tlat avangin Composer leh Label te pawhin an insem fai vek hial ve fo a ni. Contract chi hrang hrang, an hman nasat zualte pawh kan la ziak zel dawn nia. Publishing Rights i nei em, Compositional Copyright hi i nei anih chuan, I hla an thehdarh apiangin royalty i la ve thei ania, lo in chhui chiang teh khai. Zawh duh i neih chuan kan website kaltlang hian biak pawh theih reng kan ni.

61 views0 comments

Recent Posts

See All

댓글


Post: Blog2_Post
bottom of page