Hla Royalty, Tu Ta Nge?

Article hmasa lamah Copyright kan sawi nual tawh a, a kaihhnawih royalty lam i hawi ve leh teh ang. Awlsam taka sawi dan chu - Royalty hi copyright neitute ta a ni. Copyright neitu chu tunge tih kan sawi fo tawh kha, han zep leh zauh ila, chhiar zau duh tan article hmasa lamah khan kan tarlang nual tawh e. Hla re re hian copyright chi hnih a nei a, Composition Copyright, hla thu leh a thluk tan a awm phawt a, recording tih hnuah Master Copyright a awm leh a nih kha. Heng copyright neitute hi mi pakhat chauh pawh a ni thei a (mahni hla phuah sa tan chuan), Artist leh Producer contract azir te, Composer leh Label/Producer inremna azir te thlengin, Copyright pakhat chauh pawh hi mi tam tak inṭawm pawh a ni thei tho a ni. (Cover chungchang la hrut lo ila, article dang kan ziak dawn nia). Tichuan heng copyright pahnih hian royalty chu an hlawh ta a, Composition Copyright hian Mechanical/Performance Royalty a hlawh a, Master Copyright hian Recording Royalty a hlawh ve thung a ni. Heng royalty pahnihte hi a kalkawng (pipeline) a inang lo fo a, Recording Royalty hi zai release-tu DSP (Distributor) ah a kal mai a, a fel nghal duak mai a, Mechanical Royalty erawh hi chu a kual thui hle thung. Mechanical Royalty hi lakhawmtu Society a awm hrang a, Publishing Company/Admin te nen an thawk kawp thin. An hnathawh hi Publishing Administration an tih chu a ni a, kan la hmelhriat loh, kan mamawh em em chu a ni. St Ange Pub - Hei hi St Ange service pakhat a ni a, hla phuahtute tan bik a ni a, Publishing Royalty lak theihna a ni.